Негізгі мазмұнға өту
Sanaq

Көмек

Мұнда Sanaq сервисін баптаудың төрт қадамы және жиі қойылатын сұрақтардың жауаптары жиналған.

Мазмұны

  1. Kaspi токенін қалай алуға болады
  2. Банк үзіндісін қалай жүктеуге болады
  3. Өзіндік құнды Excel үлгісімен толтыру
  4. Telegram-ды қосу
  5. Жиі қойылатын сұрақтар

Kaspi токенін қалай алуға болады

Токен — Sanaq сервисіне Kaspi дүкеніңіздің тапсырыстары мен тауарларын оқуға рұқсат беретін кілт. Оны Kaspi сатушы кабинетінен аласыз.

  1. 1

    Kaspi сатушы кабинетін ашыңыз: kaspi.kz/mc (жаңа қойындыда ашылады)

  2. 2

    Настройки (Баптаулар) → Токен API бөліміне өтіңіз.

  3. 3

    Токен бұрыннан болса — соны көшіріңіз. Жаңасын тек токен жоқ болса жасаңыз (Сформировать).

  4. 4

    Токенді «Дүкен» бетіндегі «Kaspi API токені» өрісіне қойып, «Қосу» батырмасын басыңыз.

Жаңа токен жасасаңыз, ескісі жұмысын тоқтатуы мүмкін — басқа сервистер (мысалы, басқа аналитика) өшіп қалады.

Токенді қойған соң оны Kaspi-ге бір сұрау жіберіп тексереміз. Жарамды болса, дүкен қосылады да, тапсырыстар жүктеле бастайды: алдымен соңғы аптаның, содан кейін соңғы 30 күннің тарихы. Жүктелу барысы «Дүкен» бетінде көрініп тұрады — бетті жаңартудың қажеті жоқ.

  • Токен қабылданбаса, оны кабинеттен басынан аяғына дейін толық көшіргеніңізді тексеріңіз.
  • Kaspi жауап бермесе, бір минуттан кейін қайталап көріңіз.
  • «Бұл дүкен басқа аккаунтқа қосылған» деген хабар шықса, бұрын басқа email-мен тіркелген болуыңыз мүмкін: сол email-мен кіріңіз не бізге жазыңыз.

Токенді кейін ауыстыру керек болса (мысалы, Kaspi кабинетінде жаңасын жасасаңыз), жаңа токенді «Дүкен» бетіндегі «Токенді ауыстыру» бөліміне қойыңыз. Токенді тек ұйым иесі қоса және ауыстыра алады.

Токенді тек деректерді ОҚУ үшін қолданамыз: тапсырыстар мен тауарлар. Тапсырысты қабылдамаймыз, одан бас тартпаймыз, бағаны өзгертпейміз. Токен шифрланып сақталады; сатып алушылардың аты, телефоны, мекенжайы сақталмайды.

Банк үзіндісін қалай жүктеуге болады

Жарнама, пікір үшін бонустар және шот ұстау ақысы Kaspi тапсырыстарында көрінбейді — олар тек Kaspi Business шотының үзіндісінде бар. Үзіндіні жүктесеңіз, таза пайда осы шығындарды да ескереді.

Банк үзіндісі «Тиімді» тарифінен бастап қолжетімді — Тарифтер.

Алдымен үзінді файлын Kaspi Business-тен жүктеп алыңыз:

Kaspi Business → Kaspi Pay шоты → «Выписка» → кезеңді таңдап, Excel (.xlsx) түрінде жүктеп алыңыз.

  • Пішімі — Excel (.xlsx), көлемі — ең көбі 5 МБ.
  • Файлды Kaspi Business қалай берсе, сол күйі жүктеңіз: жолдарын өшірмеңіз және өңдемеңіз. Жолдардың қосындысы үзіндідегі «Итого» жолымен сәйкес келмесе, файл қабылданбайды.
  • Бір үзіндінің кезеңі 366 күннен аспауы керек — ұзағырақ кезеңді бөліп жүктеңіз.
  • Кезеңнің соңғы күні ретінде кешегі не одан ертерек күнді таңдаңыз: аяқталмаған күннің жолдары сақталмайды, олар келесі үзіндімен келеді.
  • Кезеңдер қабаттасса да алаңдамаңыз: бұрын жүктелген жолдар қайта қосылмайды.

Содан кейін файлды Sanaq сервисіне жүктеңіз:

  1. 1

    1. «Банк үзіндісі» бетін ашыңыз (сілтемесі «Баптаулар» бетінде де бар).

  2. 2

    2. Файлды таңдап, «Үзіндіні тексеру» батырмасын басыңыз.

  3. 3

    3. Тексеру бетінде не сақталатынын қараңыз: жарнама, пікір үшін бонустар және шот ұстау ақысы пайдаға кіреді; комиссия, Kaspi Pay процессингі және жеткізу тек біздің есеппен салыстырылады.

  4. 4

    4. Бірінші үзіндіде шоттың осы дүкендікі екенін растаңыз — мұны ұйым иесі жасайды. Кейінгі үзінділер сол шот иесімен өздігінен тексеріледі.

  5. 5

    5. «Сақтау» батырмасын басыңыз — пайда қайта есептеледі.

Kaspi жарнама ақысын келесі күні ұстайды. Сондықтан кезеңнің соңғы күнінің жарнамасы келесі үзіндіде болады: бір айдың жарнамасы толық есепке кіруі үшін үзінді кезеңіне келесі айдың бірінші күнін де қосыңыз.

Үзінді жүктелмеген күндерде жарнама шығыны белгісіз, сондықтан «Шолу»-да таза пайда «жарнамасыз» деп көрсетіледі.

Базада тек санат, күн, сома және құжат нөмірі сақталады. Контрагенттер, олардың шоттары мен ЖСН/БСН-ы, төлем мақсатының мәтіні сақталмайды.

Өзіндік құнды Excel үлгісімен толтыру

Таза пайда есептелуі үшін әр тауардың өзіндік құны керек. Оны «Өзіндік құн» бетінде қолмен де, Excel файлымен де енгізуге болады; тауар көп болса, Excel ыңғайлырақ.

  1. 1

    1. «Өзіндік құн» бетінде «Үлгіні жүктеу (.xlsx)» батырмасын басыңыз. Үлгіде дүкеніңіздің тауарлары тұрады: өзіндік құны енгізілмегендері — жоғарыда, бұрын енгізілгендері — толтырулы.

  2. 2

    2. Соңғы бағанға әр тауардың бір данасының өзіндік құнын жазыңыз (сатып алу бағасы мен өзіңізге дейінгі жеткізу шығыны). Қалған бағандарды өзгертпеңіз.

  3. 3

    3. Файлды сақтап, сол беттегі өріске жүктеңіз де, «Файлды тексеру» батырмасын басыңыз.

  4. 4

    4. Тексеру бетінде дұрыс және қате жолдардың саны көрсетіледі. Бәрі дұрыс болса, «Сақтау» батырмасын басыңыз — пайда шамамен бір минут ішінде қайта есептеледі.

Үлгінің бағандары:

БағанНе жазылады
Kaspi кодыТауардың Kaspi-дегі коды. Тауар осы код бойынша танылады.
SKU (артикул)Сатушы артикулы. Kaspi коды бос болса, тауар осы бойынша танылады.
АтауыТауардың атауы — тек өзіңізге ыңғайлы болуы үшін; импортта оқылмайды.
Өзіндік құн, ₸Бір дананың өзіндік құны, теңгемен. «4500» не «4 500,50» түрінде жазуға болады.
  • Өзіндік құны бос жолдар өткізіледі — бұл қате емес: тек қалаған тауарларыңызды толтыра аласыз.
  • Файл пішімі — .xlsx не .csv. Шектер: көлемі — ең көбі 5 МБ, жол саны — ең көбі 20 000, баған саны — ең көбі 100.
  • Коды дүкенде табылмаған не файлда қайталанған жол қате деп көрсетіледі де, сақталмайды; дұрыс жолдар сақталады.
  • Қате кетсе, импортты «Кері қайтару» батырмасымен бұрынғы мәндерге қайтаруға болады.
  • Басқа сервистен алынған каталог файлын да («Артикул / Код» және «Себестоимость за шт» бағандарымен) өзгертпей жүктеуге болады.

Excel арқылы енгізілген сома тауардың «ағымдағы өзіндік құны» болады және барлық кезеңдегі сатылымдарға қолданылады: оны өзгертсеңіз, бұрынғы күндердің пайдасы да қайта есептеледі.

Сатып алу бағасы партиядан партияға өзгеріп тұрса, партияларды жүргізіңіз (FIFO): «Өзіндік құн» бетінде тауарды ашып, партияның келген күнін, санын және бір дана құнын қосыңыз. Сатылымдар тауар берілген күннің ретімен ең ескі партиядан бастап жұмсалады. Партия таусылғанда қалған сатылымдарға ағымдағы өзіндік құн қолданылады, ол да енгізілмесе, сатылымның өзіндік құны «белгісіз» болып, пайдаға қосылмайды. Партияның күні тек кезекті анықтайды: партияны кешігіп енгізсеңіз де, ол есепке алынады.

Telegram-ды қосу

Telegram боты әр таңертең кешегі күннің қорытындысын жібереді: түсім, таза пайда, ең пайдалы тауар және ескертулер. Қаласаңыз, жаңа тапсырыстар туралы да хабарлайды.

  1. 1

    1. «Баптаулар» бетіндегі Telegram бөлімінде «Telegram-ды қосу» батырмасын басыңыз. Дүкенді жаңа қосқан болсаңыз, бұл батырма «Дүкен» бетінде де тұрады.

  2. 2

    2. Жаңа қойындыда бот ашылады — Telegram-да Start батырмасын басыңыз.

  3. 3

    3. Sanaq бетіне оралыңыз: бірнеше секундтан кейін «Telegram қосылды» деген жазу шығады. Сілтеме 15 минут жарамды; үлгермесеңіз, батырманы қайта басыңыз.

Бір дүкенге бірнеше чат қосуға болады: ұйымның әр қолданушысы өз Telegram-ын өзі қосады, қажет болса өзі ажыратады.

Есеп баптаулары дүкенге ортақ, оларды ұйым иесі өзгертеді:

Күнделікті есеп · Есеп уақыты
Алматы уақыты. Есеп кешегі күн туралы.
Жаңа тапсырыстар туралы хабар
әр синхрондаудан кейін, шамамен 10 минут сайын
Үзінді туралы еске салу
Айдың 3-күні, өткен айдың үзіндісі жүктелмесе
  • Есеп уақыты 15 минут дәлдікпен таңдалады. Деректер жаңарып үлгермесе, есеп сәл кешігіп келуі мүмкін.
  • Хабарлардың тілі чатқа байланған: әдепкіде — Telegram-ды қосқан сәттегі сайт тілі. Өзгерту үшін «Баптаулар → Telegram» бөліміндегі «Есеп тілі» тізімін қолданыңыз не ботқа /lang командасын жіберіңіз.
  • Хабарларды уақытша тоқтату үшін ботқа /stop, қайта қосу үшін /start командасын жіберіңіз.
  • «Тест есебін жіберу» батырмасы есептің қалай көрінетінін бірден көрсетеді.

Хабарламаларда сатып алушы туралы дерек жоқ.

Жиі қойылатын сұрақтар

Сандардың қалай есептелетіні, тарифтер және деректердің қауіпсіздігі туралы.

Неге мұндағы таза пайда Kaspi аударатын сомадан өзгеше?

Kaspi түсімнен тек өз ұстауларын шегереді: комиссияны, Kaspi Pay процессингін және жеткізуді. Таза пайдада бұған қоса тауардың өзіндік құны мен салық шегеріледі (әдепкі салық мөлшерлемесі — түсімнің 4%, оны «Баптаулар» бетінде өзгертесіз), ал банк үзіндісі жүктелген күндерде — жарнама, пікір үшін бонустар және шот ұстау ақысы да.

Күндер де әсер етеді: түсім мен пайданы тауар сатып алушыға берілген күн бойынша есептейміз, ал қайтарылған тапсырыс бастапқы сатылым күнінің пайдасын түзетеді.

Өзіндік құны енгізілмеген сатылымдар пайдаға мүлде қосылмайды — олар бөлек көрсетіледі.

«Жарнамасыз» деген белгі нені білдіреді?

Жарнама шығыны Kaspi тапсырыстарында жоқ — ол тек банк үзіндісінен алынады. Үзіндімен жабылмаған күндерде жарнама белгісіз, сондықтан таза пайда «жарнамасыз» деп белгіленеді: нақты пайда одан аз болуы мүмкін. Белгі кетуі үшін банк үзіндісін жүктеңіз.

Telegram есебінде мұндай күнге бағалау жолы қосылады: қамтитын кезеңі соңғы 60 күнде аяқталған үзіндідегі жарнаманың түсімдегі үлесі қолданылады.

«Өзіндік құны белгісіз» сатылым деген не?

Бұл — тауарының өзіндік құны енгізілмеген (не партиялары таусылып, ағымдағы құны жоқ) сатылым. Оның пайдасын нөл деп санамаймыз: мұндай сатылым пайда мен маржа есебіне кірмейді.

Ондай сатылым болса, «Шолу»-да ескерту жолағы шығады: «Толтыру» батырмасы сол тауарларды «Өзіндік құн» бетінде бірден ашады.

Шығынсыз баға қалай есептеледі?

Шығынсыз баға — тауардың пайдасы нөлге тең болатын ең төменгі баға. Есепке өзіндік құн, санаттың Kaspi комиссиясы (ҚҚС-пен), Kaspi Pay процессингі (0,95%), салық, сол бағадағы жеткізу құны және кредитпен сатылған үлес кіреді.

Kaspi жеткізу құны тапсырыс сомасына тәуелді. Сондықтан жеткізуді кезеңнің орташасымен емес, сол бағадағы тапсырыс сомасына сай құнымен аламыз: Kaspi-дің жария тарифі бойынша, ал тауарыңыздың өз тапсырыстарында жеткізу қымбатырақ шықса — солар бойынша. Дүкеннің деректері соңғы 60 күндегі тапсырыстардан алынады; дүкенді жақында қосқан болсаңыз — жүктелген тарихтан (қосқанға дейінгі 30 күн және одан кейінгі күндер). Баға бүтін теңгеге жоғары қарай дөңгелектенеді.

«Жарнамамен» деп көрсетілген баға соңғы банк үзіндісіндегі жарнама үлесін де жабады. Шығынсыз баға «Тиімді» тарифінен бастап көрсетіледі.

Комиссия мөлшерлемесі қайдан алынады?

Әр тауардың санаты бойынша Kaspi-дің ресми кестесінен. Жеке жеңілдігіңіз не акция тарифіңіз болса, мөлшерлемені «Комиссия» бетінде санат бойынша, ал тауар бетінде жеке тауар бойынша түзете аласыз. Санат кестеден табылмаса, әдепкі мөлшерлеме қолданылып, «болжамды» деп белгіленеді.

Сынақ мерзімі қалай жұмыс істейді және біткенде не болады?

Сынақ мерзімі 7 күнге созылады және дүкеніңіз Kaspi-мен алғаш сәтті синхрондалған сәттен басталады. Осы уақытта «Тиімді» тарифінің мүмкіндіктері ашық.

Мерзім бітерден 2 күн бұрын және біткен күні email мен Telegram арқылы ескертеміз. Мерзім біткен соң деректеріңіз сақталады және Kaspi-мен синхрондау жалғасады, бірақ сервисте тек «Тарифтер» мен «Баптаулар» ашық қалады, ал Telegram есебі тоқтайды. Жалғастыру үшін тариф таңдаңыз.

Деректерім қаншалықты қауіпсіз?

Kaspi токенін тек деректерді оқу үшін қолданамыз: тапсырысты қабылдамаймыз, одан бас тартпаймыз, бағаны өзгертпейміз. Токен шифрланған күйде сақталады.

Сатып алушылардың аты, телефоны мен мекенжайы базаға да, журналдарға да жазылмайды — тапсырыстан тек қала сақталады. Банк үзіндісінен тек шығын санаты, күні, сомасы және құжат нөмірі алынады. Толығырақ — Құпиялылық саясатында.

Дүкенді қосқанда қай уақыттың тапсырыстары жүктеледі?

Алдымен соңғы аптаның тапсырыстары жүктеледі, содан кейін фонда соңғы 30 күннің тарихы толтырылады; барысы «Дүкен» бетінде көрініп тұрады. Жүктелген тарихтан бұрынғы күндерде «Шолу» нөл емес, «дерек жоқ» деп көрсетеді.

Kaspi токені жарамсыз болып қалса не істеймін?

Бұл көбіне Kaspi кабинетінде жаңа токен жасалғанда болады: ескісі жұмысын тоқтатуы мүмкін. Ондайда «Шолу» мен «Дүкен» беттерінде ескерту шығады, Telegram қосулы болса, хабар да келеді.

Жаңа токенді «Дүкен» бетіндегі «Токенді ауыстыру» бөліміне қойыңыз — бұрынғы деректер сақталады, синхрондау жалғасады. Токенді тек ұйым иесі ауыстыра алады.

Қызметкерімді қалай қосамын?

«Баптаулар» бетіндегі «Команда» бөлімінде оның email мекенжайын жазып, шақыру жіберіңіз — мұны тек ұйым иесі жасай алады. Шақыру сілтемесі 7 күн жарамды және тек сол email-мен тіркелген аккаунтқа жарайды.

Мүше шолуды, пайданы және тапсырыстарды көреді, өзіндік құнды енгізіп, банк үзіндісін жүктей алады; тариф, төлем, шақырулар және Kaspi токені тек ұйым иесіне ашық. Қолданушылар саны тарифке байланысты — Тарифтер.

Тағы бір дүкенді қалай қосамын?

Дүкенді тек ұйым иесі қосады: «Дүкен» бетіндегі «Дүкен қосу» батырмасы арқылы, жаңа дүкеннің өз Kaspi токенімен. Әр дүкеннің есебі бөлек жүргізіледі, ал дүкендер арасында жоғарғы жолдағы ауыстырғышпен ауысасыз.

Бірнеше дүкен «Толық» тарифінде қолжетімді — 3 дүкенге дейін.

Сұрағыма жауап таппадым. Қайда жазамын?

support@sanaq.app мекенжайына жазыңыз: дүкеніңіздің атауын және не болғанын қысқаша сипаттаңыз. Kaspi токені мен құпия сөзіңізді хатқа жазбаңыз — біз оларды ешқашан сұрамаймыз.

Жауап таппадыңыз ба? Бізге жазыңыз: support@sanaq.app.

© 2026 ЖК QAJET ALL · ЖСН 960601300988
КөмекЖария офертаҚұпиялылық саясаты
Қолдау: support@sanaq.app